Bukavu yongeye gufatwa n'inkongi y'umuriro nanone habura abatabara

Umujyi wa Bukavu muri Repubulika Iharanira Demukarasi ya Congo,ukomeje kwibasirwa n'inkongi y'umuriro nyuma yuko ku wa Gatatu tariki ya 24 Nyakanga hongeye kwaka umuriro ukaze ndetse habura ubutabazi nkuko byagiye bigenda mbere hose.

Amakuru avuga ko hangiritse ibintu byinshi ndetse umuntu umwe ahasiga ubuzima.

Kuri iyi nshuro iyi nkongi yibasiye abantu 25, aherereye muri Quartier ya Cimpunda ku muhanda wa Mukasi Elila ho mu mujyi wa Bukavu uzwi nk'umurwa w'Intara ya Kivu y'Amajyepfo.

Kubera uburyo ibintu byashaga nta butabazi, umugabo umwe uri mu kigero cy'imyaka 55 yabonye ibintu bye biri gushya ahita afatwa n'indwara y'umutima ahita ahasiga ubuzima.

Mu ntangiriro z'uku Kwezi nibwo i Bukavu amazu agera ku icumi ndetse arenga yarahiye arakongoka, kandi aharimo ibintu byinshi birimo n'ibyagaciro, nkuko byavuzwe n'abaturiye i bice byo mu mujyi wa Bukavu.

Ni inshuro ya gatatu uyu mujyi ufatwa n'inkongi y'umuriro ariko buri gihe habura abatabara ngo bikaba biterwa n'imihanda mibi nkuko bivugwa n'Ubuyobozi bw'iyi Ntara.