Ese koko Mukura VS ishobora kudaterwa mpaga kubera raporo yihariye y’abatekinisiye?

Umukino wa 1/2 w’Igikombe cy’Amahoro wahuje Mukura Victory Sports na Rayon Sports ku wa Kabiri, wasize urujijo nyuma yo guhagarara ku munota wa 26 kubera ikibazo cy’ibura ry’amashanyarazi kuri Stade Mpuzamahanga ya Huye.

Nk’uko biteganywa n’ingingo ya 38.3 y’amategeko ya FERWAFA, ikipe yakiriye umukino ishobora guterwa mpaga y’ibitego 3-0 igihe umukino uhagaze kubera umwijima uturutse ku mashanyarazi, hatabayeho ibisobanuro bifatika bitangwa mu gihe giteganywa n’amategeko.

Gusa amakuru aturuka ahizewe avuga ko itsinda ry’abatekinisiye barimo abakozi b’Akarere ka Huye ndetse n’ab’Ikigo gishinzwe ingufu muri Ministeri y’Ibikorwa Remezo, bari kuri Stade Huye ubwo ikibazo cyabaga. Abo batekinisiye basabwe gutanga raporo irambuye, ishobora kuzashingirwaho kugira ngo Mukura VS itabazwa igihombo cy’ihagarikwa ry’umukino.