Goma mu maboko ya M23: Imipaka yongeye gufungurwa, Abanyarwanda bataha bishimira ubuzima.

Nyuma y’uko umujyi wa Goma ufashe n’umutwe wa M23, ubuzima bw’abaturage n’abari mu bucuruzi hagati ya Repubulika Iharanira Demokarasi ya Congo (RDC) n’u Rwanda butangiye gusubira ku murongo.

Imipaka ihuza Goma na Gisenyi yongeye gufungurwa, bituma abashoferi n’abacuruzi bari barabuze uko bataha binjira mu Rwanda, bashimira Imana kuba bongeye kubona amahirwe yo gutahuka.

Bamwe mu baturage basize inyuma imirwano baravuga ko ingabo za FARDC zishyikiriza M23 nyuma yo gutsindwa.

Nubwo amasasu make akirangwa mu mujyi wa Goma, hari icyizere cy’uko ubuzima bugenda bugaruka. Bamwe mu baturage batangiye gusubukura ubucuruzi bwabo, bityo umujyi ugenda wongera gusubira ku murongo.

Ku rundi ruhande, M23 yihaye inshingano zo kugarura amahoro, gucyemura ikibazo cy’amazi meza n’amashanyarazi byari byarabaye ikibazo gikomeye mu mujyi wa Goma.

Ibi bitanga icyizere ko umujyi ushobora kongera gukomera, nubwo ingaruka z’intambara zikomeje gusiga ibikomere ku baturage. Icyakora, hari isomo rikomeye ku kuba ubuzima bushobora kongera kubyutswa n'ubwo intambara zakomerekeje benshi.