Umuherwe w'Umunyarwanda Tribert Rujugiro  yapfuye

Mu ijoro ryakeye nibwo hamenyekanye amakuru avugako umuherwe w'Umunyarwanda Tribert Rujugiro Ayabatwa, wari umaze imyaka myinshi ataba mu Rwanda yapfuye ku myaka 83.

Hagati aho, mu kiganiro n'ikinyamakuru New Vision cyo muri Uganda mu 2019, yavuze ko atazi imyaka ye neza kuko ubwo yavukaga hatari hariho uburyo ubutegetsi bwandikaga abana bavutse, gusa ngo yabwiwe ko yavutse mu ntagiriro y'imyaka ya 1940.

Umwe mu banyamategeko be yahamirije BBC Gahuzamiryango urupfu rwa Rujugiro, yongeraho ati: "Nta yandi makuru dufite yo gutanga muri aka kanya."

Amakuru avuga ko yari asigaye aba i Dubai muri Emira Zunze Ubumwe z'Abarabu (UAE).

Mu Rwanda, Rujugiro yamenyekanye cyane ku bw'inyubako ye iri rwagati mu mujyi wa Kigali yari izwi nka UTC (Union Trade Centre), iri mu za mbere ndende zahubatswe nyuma ya jenoside yakorewe Abatutsi mu 1994.

Iyo nyubako ibarirwa agaciro kari hafi cyangwa karenga miliyoni 20 z'amadolari y'Amerika. Yafunguye imiryango mu 2006.

Leta yayiteje cyamunara mu 2017 ivuga ko Rujugiro umunyamigabane myinshi  ayibereyemo umwenda w'imisoro irenga miliyoni imwe y'amadolari, ibyo we yakomeje guhakana.

Ubwo UTC yatezwaga cyamunara, hari hasanzwe hari urubanza hagati ya Rujugiro na leta y'u Rwanda mu rukiko rw'ibihugu by'Afurika y'uburasirazuba (East African Court of Justice, EACJ) ku kwigarurirwa kw'iyi nyubako mu 2013 n'akarere ka Nyarugenge nk'umutungo udafite ba nyirawo.

Muri Kanama mu 2022, urwo rukiko  rufite icyicaro i Arusha muri Tanzania rwari rwategetse leta y'u Rwanda kwishyura Rujugiro indishyi ya miliyoni imwe y'amadolari y'Amerika (arenga miliyari imwe mu mafaranga y'u Rwanda), kuko ibikorwa by'u Rwanda byo "kwigarurira na nyuma yaho ikagurisha iduka rinini rya UTC byari binyuranyije n'amategeko".

Icyo gihe, nyuma y'uwo mwanzuro w'urukiko mu bujurire, Rujugiro yatangajeko  ko kuri we ayo mafaranga ahagije, "kuko ngp icyanjyanye mu rukiko atari ukugira ngo bamuhe indishyi y'akababaro ahubwo ko ari ukugira ngo bamubize inyubako ye"

Ubucuruzi bwa Tribert Rujugiro  bwarenze u Rwanda n'u Burundi kandi yari afite ibikorwa by'ubucuruzi mu bihugu nka Uganda, Tanzania, Repubulika ya Demokarasi ya Congo, Angola, Sudani y'Epfo, Afurika y'Epfo na Nigeria.