Umusore watutse Perezida Museveni n'umuryango we yakatiwe urumukwiye

Urukiko rwo muri Uganda rwakatiye umugabo w'imyaka 24 gufungwa imyaka itandatu kubera gutuka perezida n'umuryango we abinyujije muri videwo yatangaje ku rubuga nkoranyambaga rwa TikTok.

Edward Awebwa yarezwe gukoresha imvugo y'urwango no gukwirakwiza amakuru ayobya ndetse aharabika Perezida Yoweri Museveni, umugore we Janet Museveni n'umuhungu we Muhoozi Kainerugaba, akaba ari n'umugaba mukuru w'ingabo.

Urukiko rwanumvise ko Awebwa yatangaje amakuru yo gutukana avuga ko hazabaho kuzamura imisoro ku butegetsi bwa Perezida Museveni.

Urwegwa yari yemeye icyaha ndetse anasaba imbabazi.

Umucamanza ukuriye iburanisha yavuze ko nubwo yari yasabye imbabazi, yagaragaje ko aticuza ibikorwa bye, ndetse ko amagambo yakoresheje muri videwo yari nyandagazi cyane".

Umucamanza Stella Maris Amabilis yagize ati: "Uregwa akwiye igihano kizamufasha kwigira ku hahise he kugira ngo ubutaha azubahe perezida, umugore wa perezida n'umuhungu wa perezida."

Yakatiwe gufungwa imyaka itandatu kuri buri kirego mu birego bine aregwa, yitezwe kubihanirwa icyarimwe imyaka itandatu.

Imiryango iharanira uburenganzira ihora yamagana abategetsi ba Uganda ibashinja guhonyora uburenganzira bwa muntu n'ubwisanzure bwo kuvuga icyo umuntu atekereza.

Mu mwaka ushize, urukiko rushinzwe kurinda iremezo ry'itegekonshinga rwanzuye ko igika cyo mu itegeko rihana "imvugo itukana" kinyuranyije n'itegekonshinga.

Umunyamategeko ku burenganzira bwa muntu w'Umunya-Uganda, Michael Aboneka, yavuze ko Awebwa yarezwe hashingiwe kuri iryo tegeko ryagutse, avuga ko abanyamategeko bagihatana na ryo mu rukiko kuko "ntirisobanutse".

Uwo munyamategeko yatangaje ko perezida n'umuryango we bakwiye kwitega kunengwa "ku mfuruka iyo ari yo yose"

Perezida Museveni ari ku butegetsi kuva mu mwaka wa 1986  bivuze ko yabugezeho Awebwa asigaje imyaka 14 ngo avuke.