Urubanza Diamond aregwamo kwishyura miliyoni 33 rwasubukuwe

Ijambonews. 2020-05-20 14:59:05

Urubanza umuhanzi Diamond Platnumz aregwamo kwangiza bimwe mu bikoresho by’inyubako, kutishyura ubukodi mu gihe cy’umwaka n’amezi 4 aho studio ye ya Classic Wasafi Baby yabanje gukorera, rwimuririwe tariki ya 3 Nyakanga 2020.

Uru rubanza rwatangiye kuburanishwa mu mizi muri Werurwe 2020 mu Rukiko rw’Ubutaka rw’Akarere ka Kinondoni mu Mujyi wa Dar es Salaam.

Maulid Wandwi wakodesheje Diamond aregera miliyoni 33 z’amashilingi ya Tanzania aho yavuze ko yasabye Diamond kumwishyura umwaka maze amezi 4 akayamubabarira, ibi ariko si ko ku ruhande rwa Diamond babibona kuko uhagarariye uyu muhanzi, Wakili Frank Modestus mu rukiko yerekanye inyandiko zivuga ko bumvikanye ko bazishyura amezi 4 ubundi bagasana n’inzu bakoreragamo.

Uru rubanza rukaba rwaragombaga gukomeza tariki ya 7 Gicurasi 2020 ariko kubera ko impande zombi zitabonetse ndetse zigatanga n’impamvu, rwimuriwe tariki ya 3 Nyakanga 2020 aho hazakomeza kumvwa impande zombi.