Ibihano by’amahanga ntibibangamiye ubucukuzi bw’amabuye y’agaciro mu Rwanda- Abashoramari. 

Mu gihe ibihano mpuzamahanga bishobora kugira ingaruka ku bucuruzi bw’amabuye y’agaciro, abashoramari bakomeje kugaragaza icyizere cy’iterambere ry’uru rwego mu Rwanda. Kompanyi ya DUMAC Ltd, icukura Koruta na Gasegereti mu Murenge wa Nzige, Akarere ka Rwamagana, yemeza ko ingamba za Leta zatangiye gutanga umusaruro, zikongera ingano n’ubwiza bw’amabuye aboneka ku isoko.

Iterambere ry’ubucukuzi bw’amabuye y’agaciro muri DUMAC Ltd

Mu birombe biri kuri metero zisaga 300 z’ubujyakuzimu, Eng. Ngaruwenimana Eliya ukoresha ikoranabuhanga mu kumenya aho amabuye ari, bigafasha abacukuzi kwihutisha akazi. Ubu, kompanyi isarura Toni imwe n'ibiro 700 bya Koruta na Gasegereti buri munsi, aho mu kwezi byinjiza asaga Miliyoni 400 Frw.

Kwiyongera kw’abakozi no gukoresha ikoranabuhanga

Mu myaka itatu ishize, DUMAC Ltd yari ifite abakozi 120, ariko ubu bamaze kurenga 1 100, bikagaragaza iterambere ry’urwego. Umuyobozi mukuru w’iyi kompanyi, Kwizera Jean Bosco, avuga ko gukoresha uburyo bushya bwo gucukura byatumye barusha izindi kompanyi mu gutanga umusaruro mwinshi.

Ibihano by’amahanga ntibibaca intege

Nubwo ibihugu bimwe bikomeje gufatira u Rwanda ibihano bijyanye n'ibibazo bya politiki mu karere, aba bashoramari bavuga ko badatewe impungenge, kuko ubucukuzi bwabo bufite isoko rikomeje kwaguka. Nsengumuremyi Donati, ushinzwe ubugenzuzi bw’ubu bucukuzi mu Kigo cy’Igihugu gishinzwe Mine, Peteroli na Gaz, yemeza ko u Rwanda rukize ku mabuye y’agaciro, bityo iterambere ry’uru rwego rizarushaho gutanga umusaruro.

Ubucukuzi bw’amabuye bufite ejo hazaza heza

Ibikorwa byo gucukura muri ibi birombe byitezweho gukomeza mu gihe kitari munsi y’imyaka 100 iri imbere, bikaba ikimenyetso cy’uko ubucukuzi bw’amabuye y’agaciro ari inkingi ikomeye y’ubukungu bw’u Rwanda.

Umwanditsi: Nsengima Donatien | Ijambo.net