Imikinire ya Andre Onana ikomeje gutera urujijo ku bakunzi ba Manchester United.

Mu gihe bamwe bagishidikanya ku muzamu wa Manchster United Andre Onana kubera amakosa atandukanye akora, akanatuma ikipe itsindwa ibitego bidasobanutse, abandi bashimangira ko imikinire ye izahuza na gahunda z’umutoza mushya.

Mu ijorpo ryo ku wa Kane, Manchester United yatsinze Viktoria Plzeň mu mukino wa Europa League, ariko amakosa ya Andre Onana, umunyezamu w’iyi kipe, yongeye kwibazwaho ku ikosa ryatanze igitego.

Rasmus Højlund ni we wagobotse ikipe atsinda ibitego bibiri byatumye Manchester United ibona amanota atatu, ariko ikosa rya Onana ry’uko yatanze umupira nabi rikavamo igitego cya Matej Vydra, ryasize benshi bibaza ku mwanya we mu ikipe, batangira gutekereza ko Manchester United ikwiye undi muzamu utari Onana.

Onana yakoze ikosa ryo gushaka gutanga umupira kuri Matthijs de Ligt, ariko Pavel Šulc aritambika maze ahereza umupira Matej Vydra atsinda igitego.

Nubwo Manchester United yaje gutsinda uwo mukino 2-1, iki gitego cyari ikosa rya kabiri Onana yakoze mu mikino ibiri ikurikiranye, nyuma yo kurikora mu mukino wa Premier League bahuyemo na Nottingham Forest.

Muri uwo mukino wa Nottingham, Onana ntiyashoboye guhagarika umupira wa Morgan Gibbs-White, byatumye ikipe itsindwa 3-2. Uretse ibi, Onana yagarutsweho no mu mwaka ushize ubwo amakosa ye yatumye United itakaza amanota akomeye mu mukino wa Champions League na Galatasaray na FC Copenhagen.

Nyuma y’uyu mukino wahuje Manchester United na Viktoria Plzeň, Bruno Fernandes, kapiteni wa Manchester United, yumvikanye ashyigikiye Onana agira ati “Ntitwareba umuntu umwe iyo hari ikosa. Tumufitiye icyizere gikomeye, kandi tuzi ko azadufasha inshuro nyinshi. Amakosa yo  mu mukino, ni igice kigize umupira.”

Ubushobozi bwa Onana bwo gukina umupira n’amaguru ni bwo bwatumye ahabwa umwanya wa mbere muri iyi kipe, aho yasimbuye David De Gea mu rwego rwo kujya batangira gukina umupira, wubatse uturutse inyuma.

Umutoza Ruben Amorim, kimwe n’abandi batoza bagezweho, bakunda gukina umupira ushingiye ku gutambutsa udupira duto, uhereye inyuma. Ibi bivuze ko amakosa ashobora kubaho igihe abakinnyi batita ku mikoreshereze y’umupira.