M23 yatwitse ibifaru bya FARDC ndetse yigarurira n'umujyi wa Kanyabayonga

Umutwe wa M23 urwanya ubutegetsi bwa Repubulika Iharanira Demukarasi ya Congo  waraye wemeje ko watwitse imodoka  enye z'ihuriro rifatanya n'ingabo za Leta ya Congo FARDC zose zo mu bwoko bw'ibifaru bidatoborwa n'amasasu ndetse ifata umujyi wa Kanyabayonga.

Ibi ni ibyatangajwe mu ijoro ryo ku wa Kane n'umuvugizi wa M23 mu bya Politike Bwana Lawrence Kanyuka, yavuze ko byabaye ngombwa ko batwika izo modoka kugirango batabare ubuzima bw'abaturage bari barimo kwicwa n'ihuriro ry'ingabo za Leta zirimo FARDC,FDLR na SADC.

M23 ishinja Ingabo za Leta n'abafatanyabikorwa bayo kwica abasivile 10 gukomeretsa benshi abandi bakava mu byabo nyuma yuko inzu zabo zisenywe n'ibisasu by'umwanzi.

Iryo tangazo ryagiraga riti"Byabaye ngombwa ko itabara mu rwego rwo kurinda abaturage hanyuma isubiza inyuma ihuriro ry'ingabo z'ubutegetsi bwa Kinshasa nyuma yo gutwika imodoka zaryo z'intambara."

Uyu mutwe kandi wemeza ko hari izindi modoka ebyeri zo muri ubwoko wafashe ndetse n'indi imwe  yo mu bwoko bw'ikamyo y'ubwikorezi.

Andi makuru avuga ko uyu mutwe waraye wigaruriye Umujyi wa Kanyabayonga uherereye muri Teritwari ya Rutshuru.

Ni nyuma y'imirwano ikomeye yari imaze iminsi yumvikana mu nkengero zawo yahuzaga uyu mutwe n'ingabo za Leta FARDC.

Amakuru avuga ko M23 yaba yigaruriye uyu mujyi mu ma saa tanu z'ijoro nyuma yuko ihuriro ry'ingabo za Leta zari zimaze guhunga.