Muri Botswana habonetse 'diamand' ya 2 mu bunini kw'isi.

Diamand ya kabiri mu bunini mu zimaze kuboneka kw'isi yavumbuwe muri  Botswana mu kirombe cy'ikigo cy'abanya-Canada Lucara Diamond aho ipima ama carat 2,492.

Ni ryo buye rya mbere rije rikurikira mu bunini iryari ryabonywe muri Afrika y'Epfo mu 1905, ryapimaga ama carat 3,106, ricibwamo ibice 9, byinshi muri byo n'ubu bibitswe mu bubiko bw'imitako y'agaciro ihora ikoreshwa mu minsi mikuru ikomeye cyane ku isi.

Iyo diamand yavumbuwe ahitwa  Karowe, mu kirombe kiri ku birometero 500 mu majyaruguru ya Gaborone, umurwa mukuru wa Botswana.

Irindi buye ry'agaciro rinini ryaheruka kubonwa ryari rifise carat 1,758 muri icyo kirombe cya Lucara Diamond hari mu 2019.

Iryo buye ryabonetse hakoreshejwe  uburyo bwa Mega Diamond Recovery X-ray' nk'uko umukuru wa Lucara, bwana Lamb, abisobanura.

Ubwo buryo bwakoreshejwe kuva mu 2017, mu kuvumbura no gukingira amabuye ya diamand y'agaciro ko hejuru, kugirango ntamenekere mu gikorwa cyo kuyatunganya no kuyavana mu gitaka iba irimo nk'uko byemezwa n'ikinyamakuru 'the Miningmx.'

Botswana ni kimwe mu bihugu bicukura diamand nyinshi kw'isi, aho ingana na 20% bya diamand  icukurwa ku isi yose

Leta ya Botswana yatangaje ko iyo diamand ariyo nini icukuwe bwa mbere mu mateka y'iki gihugu.