Ni iki Jose Chameleone agarukanye i Kigali nyuma y’imyaka 7 adataramira Abanyarwanda

Nyuma y’imyaka irindwi yari ishize adataramira mu Rwanda, umuhanzi w’icyamamare mu karere ka Afurika y’i Burasirazuba, Jose Chameleone, yasesekaye i Kigali aho aje kwifatanya n’abakunzi be mu gitaramo gikomeye giteganyijwe kuri iki Cyumweru tariki 25 Gicurasi 2025, muri Kigali Universe.

Uyu muhanzi ukunzwe cyane mu ndirimbo nka Jamila, Kipepeo, Valu Valu n’izindi, aheruka gutaramira mu Rwanda mu 2018, ubwo yari yitabiriye igitaramo cyo kumurika album ya DJ Pius yise Iwacu, cyabereye muri Camp Kigali.

“Waramutse neza Kigali!” Ni amagambo Jose Chameleone yanditse ku rubuga rwa Instagram ku wa Gatanu tariki 23 Gicurasi 2025, aho yatangaje ko ari mu ndege ya RwandAir agana i Kigali, igihugu yita “mu rugo”. Yabiherekeresheje ikimenyetso cy’umutima, agaragaza urukundo rudasanzwe afitiye u Rwanda.

Igitaramo Chameleone agiye gukorera i Kigali cyari cyarateganyijwe kuba muri Mutarama uyu mwaka, ariko gisubikwa kubera uburwayi bwe bwamusabye kujya kwivuriza muri Leta Zunze Ubumwe za Amerika.

Nyuma yo kuva kwivuza, Jose Chameleone amaze iminsi ataramira mu bihugu birimo Uganda na Kenya. Ibi bitaramo bimugaruye afite imbaraga n’udushya, kuko ategerejweho kuririmba zimwe mu ndirimbo nshya atigeze ataramira mu Rwanda.

Iki gitaramo cyitezweho gusiga amateka, kikaba n’umwanya wihariye ku bafana be bo mu Rwanda bamaze igihe bamutegereje.