Rubavu: Amasasu yambutse umupaka yinjira mu kigo cy'Ishuri akomeretsa abaturage.

Umutekano wakomeje guhungabana mu Karere ka Rubavu, aho abaturage bakomeje guhura n’ingaruka z’imirwano hagati y’umutwe wa M23 n’ingabo za FARDC muri Repubulika Iharanira Demokarasi ya Kongo (RDC).

Mu murenge wa Rubavu, akagari ka Murara, umuturage yajyanywe kwa muganga afite ibikomere bikomeye mu mutwe nyuma yo kuraswa n’isasu ryaturutse hakurya y’umupaka.

Si uwo muturage gusa wagizweho ingaruka, kuko no ku kigo cy’amashuri cya GS Rubavu haguye amasasu atandatu, rimwe rikomeretsa umunyeshuri wahise ajyanwa kwa muganga.

Ibi byateye ubwoba mu baturage b’ako gace, bigaragaza ko imirwano yo hakurya y’umupaka itakiri ikibazo cy’abenegihugu ba RDC gusa, ahubwo imaze kwambukiranya imbibi, ihungabanya imibereho y’abaturage b’u Rwanda.

Abaturage basaba inzego zishinzwe umutekano kongera ingufu mu kubarinda no gufata ingamba zihamye zo guhagarika ibi bikorwa bikomeje kubasiga mu bwoba no mu gihirahiro.

Mu gihe ibitero bikomeza kwiyongera, impungenge z’abaturage zizamuka, by’umwihariko mu rubyiruko n’abanyeshuri bahura n’iki kibazo mu buzima bwa buri munsi.