Gasabo: Amakimbirane yo mu muryango yahitanye umwana utaragira ubushobozi bwo kwitabara.

Umugabo ukurikiranyweho icyaha cy’ubwicanyi bw’umwana we w’amezi abiri , yemeye icyaha, avuga ko yamufashe akamukubita hasi, bituma ahita apfa. Ubushinjacyaha bwakiriye dosiye y’uyu mugabo kugira ngo ayiregerwe mu Rukiko Rwisumbuye rwa Gasabo.

Iri sanganya ryabaye ku wa 25 Ukuboza 2024, aho uyu mugabo yahengereye umugore we adahari, afata umwana akamukubita hasi, nyuma akandika urwandiko arushyira hafi y’umurambo w’umwana, akingirana inzu aragenda. Mu nzira, yahuye n’umugore we amuha urufunguzo rw’inzu, amubwira ko atazongera kumubona.

Ubushinjacyaha buvuga ko umugore akimara kugera mu rugo yahasanze umwana yapfuye, ahita atabaza Polisi. Uregwa yafashwe, yemera icyaha cy’ubwicanyi, asobanura uko yabikoze.

Iki cyaha cy’ubwicanyi buturutse ku bushake giteganywa n’ingingo ya 107 y’Itegeko N°68/2018 ryo ku wa 30 Kanama 2018, riteganya ibyaha n’ibihano muri rusange. Iyi ngingo ivuga ko umuntu wese wica undi ku bushake ahanishwa igifungo cya burundu.

Amakimbirane yo mu muryango yahitanye umwana utaragira ubushobozi bwo kwitabara.

Amakuru atangwa n’inzego zishinzwe iperereza agaragaza ko amakimbirane yo mu rugo ari yo ntandaro y’iki cyaha. Uyu mugabo n’umugore we bari bafitanye ibibazo bikomeye, aho buri umwe yashinjaga mugenzi we ubusambanyi no gukoresha umutungo nabi.

Impuguke mu mibanire y’abantu zivuga ko amakimbirane yo mu miryango ashobora kugira ingaruka zikomeye, cyane cyane iyo atakemuwe hakiri kare. Abashinzwe uburere n’iterambere ry’imiryango basaba ko abantu bafite ibibazo nk’ibi bajya bifashisha inzego zishinzwe gukemura amakimbirane mu miryango, aho kugira ngo bikemurwe nabi bigatera ibyago nk’ibi.

Uyu mugabo agiye kugezwa imbere y’ubutabera, aho azaburana kuri iki cyaha gikomeye. Urukiko Rwisumbuye rwa Gasabo ni rwo ruzaca urubanza rwe.