RDC: Umukozi wa Minisiteri y’Ingabo ahagaritswe azira gukoresha amagambo y’amateka.

Madame Nsuele Manika Julie, ushinzwe itumanaho mu Biro bya Minisitiri w’Ingabo muri Repubulika Iharanira Demokarasi ya Congo (RDC), yahagaritswe by’agateganyo mu kazi mu gihe cy’iminsi 30 y’akazi.

Iyi myanzuro yafashwe n’ubuyobozi bwa Minisiteri y’Ingabo ku wa 31 Mutarama 2025, nk’uko bigaragara mu rwandiko rwasinywe na Lieutenant-Général a.r. Mbuyamba Nsiona Rombault.

Nk’uko iryo tangazo ribigaragaza, Nsuele Manika Julie azize kuba yarakoresheje amagambo y’ibirangirire by’amateka nka Winston Churchill, George Patton na Nikita Khrouchtchev mu gutegura ubutumwa bw’itumanaho bwatangajwe ku wa 30 Mutarama 2025.

Ibyo byafashwe nk’amakosa akomeye ku rwego rwa minisiteri, bityo hafatwa icyemezo cyo kumuhagarika by’agateganyo guhera ku wa 1 Gashyantare 2025.

Iri hagarikwa rifite ishingiro ryo guhita ryubahirizwa, nk’uko byagaragajwe muri urwo rwandiko rwoherejwe ku bayobozi bakuru ba minisiteri, barimo Minisitiri w’Ingabo, Umunyamabanga wa Leta ushinzwe Ingabo, n’abandi bayobozi bo mu biro bye.

Nubwo impamvu nyamukuru y’iri hagarikwa itarambuwe mu buryo burambuye, biragaragara ko ubuyobozi bwa minisiteri bwafashe amagambo yakoreshejwe nk’ateshutse ku murongo w’itumanaho rya Leta.

Gusa, ibi bibazo bikomeje gukurura impaka mu nzego zitandukanye, aho bamwe babifata nk’igihano gikomeye, mu gihe abandi babona ko ari icyemezo gishingiye ku mahame ya minisiteri.

Ku rundi ruhande, nta gisobanuro kirambuye cyatanzwe na Minisiteri y’Ingabo cyangwa ubuyobozi bwa Leta kuri iyi myanzuro. Biracyategerejwe kureba niba Madame Nsuele Manika Julie azakomeza iyo mirimo nyuma y’ukwezi, cyangwa niba hashobora gufatwa izindi ngamba zijyanye n’akazi ke.