Rayon Sports ntivuga rumwe na FERWAFA.

Nyuma y’uko FERWAFA itangaje ko nta baruwa ya Rayon Sports yabonye isaba kuzakina irushanwa ry’Igikombe cy’Amahoro cy’uyu mwaka,  iy’ikepe yo yahamije ko yabeshyewe ndetse ko ifite n’ibihamya bigaragaza ko yandikiye igihe.

Tariki ya 5 Ugushyingo 2024, ni yo yari tariki ya nyuma yo kwandika amakipe yifuza kuzakina irushanwa ry’Igikombe cy’Amahoro cy’uyu mwaka.

Hasabwaga ko amakipe abyifuza, yandikira FERWAFA ibisaba ndetse ikishyura n’amafaranga ibihumbi 100 Frw yashyirwaga kuri konti y’iri shyirahamwe.

Gusa ubwo itariki ya nyuma yo kwiyandikisha yarangiraga, amakuru yavuye mu Bunyamabanga Bukuru bwa FERWAFA, yemeje ko Rayon Sports itigeze yandikira uru rwego isaba kuzakina Igikombe cy’Amahoro cy’uyu mwaka.

Aya makuru akijya hanze, Gikundiro yahise ibihakana yivuye inyuma. Ubuyobozi bw’iyi kipe bwatangaje ko ku itariki ya 28 Ukwakira 2024 Saa yine z’amanywa, ari bwo yoherereje FERWAFA E-mail isaba kuzakina iri rushanwa.

Iyi E-mail kandi yaherekejwe n’icyemeza ko yishyuye ibihumbi 100 Frw byasabwaga [borderau].

Ibi bisobanuro bya buri ruhande, birerekana ko ari impande ebyiri zikomeje kwitana ba mwana. Si ubwa mbere iri shyirahamwe ryongeye guhurira na Rayon Sports mu bisa no kumvana imbaraga, kuko si bishya cyane ko byagiye binaba kenshi  mu bihe bitandukanye.

Nsengimana Donatien.