Rayon Sports yahanduye amanota atatu mu kanwa k’intare.

Rayon Sports yatsinze Musanze FC 1-0 mu mukino w'ishiraniro wabereye muri Stade Ubworoherane kuri uyu wa Gatatu. Muri 2019, ni bwo iyi kipe yambara ubururu n'umweru yaherukaga gukura amanota atatu i Musanze.

Ikipe ya Rayon Sports niyo yabonye amahirwe menshi ugereranyije na Musanze FC , binyuze muri barutahizamu  ba Gikundiro barimo nka Aziz Bassane na Fall Ngagne kubyaza umusaruro amahirwe babonaga bikaba ari byo biba ikibazo bijyanye nuko wabonaga bagowe n'ikibuga cyo ku Bworoherane.

Igice cya mbere cyarangiye amakipe yombi akomeje kunganya 0-0. Mu gice cya kabiri Robertinho utoza Rayon Sports yaje ikora impinduka mu kibuga havamo Aziz Bassane hajyamo Charles Bbaale.

Izi mpinduka zatanze umusaruro kuko ku munota wa 51 uyu rutahizamu ukomoka muri Uganda, Charles Bbaale yafunguye amazamu ku mupira wari uvuye muri koroneri yaritewe na Muhire Kevin, abafana ba Rayon Sports bari benshi ku kibuga batangira gukoma amashyi banavuza n’ingoma.

Ku munota wa 77 iyi kipe yo mu karere ka Musanze yari ibonye igitego cyo kwishyura ku ishoti ryari rirekuwe na Salomon Adeyinka maze Khadime Ndiaye aratabara umupira usanga Pacifique nawe arekuye ishoti uyu munyezamu ukomoka muri Senegal yongera gutabara.

Umukino warangiye ikipe ya Rayon Sports yegukanye amanota 3 ku intsinzi y'igitego 1-0.

Mu yindi mikino yabaye, ikipe ya AS Kigali yatsinzwe na Marine FC ibitego 2-1, Muhazi United itsinda Amagaju FC ibitego 3-0 naho Bugesera FC inganya na Gorilla FC 0-0.

Rayon Sports izasubira mu kibuga ikina na Etincelles FC mu mukino w'ikirarane uzaba kuwa Gatandatu kuri Pere Sadium saa kumi n’ebyiri.

Nsengimana Donatien.