Bimwe mu bidasanzwe byaranze amatora y'Umukuru w'igihugu n'ay'Abadepite(Amafoto)

Amatora y'Umukuru w'Igihugu n'ay'Abadepite yaranzwe n'udushya dutandukanye dufitanye isano n'umuco nyarwanda ndetse n'igipimo cy'imyumvire y'abaturage, ku ruhare rwabo mu itorwa ry'abayobozi b'inzego z'Igihugu.

Kuri site zimwe na zimwe zo mu Mujyi wa Kigali no mu zindi Ntara, amatora yari afite ishusho y'ubukwe bikagaragazwa n'uburyo abazaga gutora n'abakorerabushake ba Komisiyo y'Igihugu y'Amatora bari bambaye barimbishije ibyumba by'itora no hanze yabyo, uburyo abantu bakirwaga, kugeza n'aho hari aho abazindutse cyane bahawe ifunguro rya mu gitondo mu gihe bari bagitegereje ko isaha ya saa moya igera ngo ibiro by’itora bifungure.

Nkaho  abaturage bo mu Kagari ka Rwebeya, Umurenge wa Cyuve, Akarere ka Musanze bateguye icyayi banywereye aho batorera mu rwego rwo kugira ngo hatazagira abakererwa bagitegura mu rugo.

Ibi kugira ngo babigereho byaturutse ku bushake bwabo maze igitekerezo Abakuru b’Imidugudu bakigeza ku buyobozi bw’Akagari na bwo bubaha inama yabafashije kugera kuri icyo gikorwa.