DRC:Ubwato bwarohamye abarenga 100 baburirwa irengero

Mu Ntara ya Mai-Ndombe mu Burengerazuba bwa Repubulika Iharanira Demukarasi ya Congo habereye impanuka y'ubwato abarenga 100 bararohama kugeza ubu bakaba bakomeje gushakishwa.

Ibinyamakuru byo muri iki gihugu byavuze ko ubu bwato bwari butwaye abarenga 300 ndetse ko imirambo ikomeje gushakishwa mu gihe abakomeretse bari kwitabwaho.

Guverineri w'intara ya Mai-Ndombe yavuze ko atewe agahinda n'iyo nkuru y'inshamugongo y'impanuka yabaye ku wa 19 Kanama, asezeranya ko hagiye gukorwa iperereza kuri iki kibazo hamenyekanye icyabiteye.

Ibindi binyamakuru byo muri iki gihugu byatangaje ko abantu bake gusa aribo babashije kurokoka iyo mpanuka ariko ko bigoye kumenya umubare nyawo w'abaguye muri iyo mpanuka.

Si ubwa mbere muri DRC haba impanuka igahitana umubare munini kuko muri Kamena uyu mwaka abantu 86 barimo abana 21 barapfuye nyuma yuko ubwato burohamye mu mugezi wa "Kwa" uherereye muri iyi Ntara ya Mai-Ndombe.