Umuryango Lambda Legal uvuganira abaryamana bahuje ibitsina wajyanye mu nkiko Minisiteri y’Ingabo ya Amerika kubw’amabwiriza igenderaho yinjiza abantu mu gisirikare, arimo kuba badafite ubwandu bwa virusi itera SIDA.

Mu 1991 nibwo Minisiteri y’Ingabo ya Amerika yashyizeho ibwiriza ribuza abantu banduye virusi ya Sida kwinjira mu ngabo.

Ikirego cyatanzwe ku wa Kane, nyuma y’uko hari umugabo uryamana n’abo bahuje igitsina, uwihinduje umugore ndetse n’umugore uryamana n’abo bahuje igitsina, bose bashatse kwinjira mu ngabo bakabangira kuko bafite agakoko gatera SIDA.

Abatanze ikirego bavuga ko SIDA itakiri indwara mbi nkuko byahoze ku buryo uyifite nta yindi mirimo yabasha kuko haje imiti igabanya ubukana, ituma abayirwaye baramba kandi ntibabashe kuba bayanduza abandi.

Ntacyo Minisiteri y’Ingabo ya Amerika yigeze itangaza kuri iki kibazo.

Umuryango Lambda uherutse gutsinda urundi rubanza yaregagamo Minisiteri y’Ingabo ya Amerika, yo kuvanaho ibwiriza ribuza abantu banduye Sida bari mu gisirikare kuba bakoherezwa mu butumwa mu mahanga.

Yanditswe na BWIZA Divine