Muri Mozambique imvura y’amahindu n’umuyaga wiswe ‘Chido’ byahitanye abantu barenga 94.

Inkubi y’umuyaga yiswe Chido yishe abantu bagera kuri 94, nk’uko byatangajwe n’ikigo gishinzwe gukumira no kurwanya ibiza muri Mozambique.

Iyo nkubi y’umuyaga mwinshi wari ufite umuvuduko wa kilometero 260 mu isaha, wivanze n’imvura nyinshi igera kuri Milimetero 250 mu masaha 24, biteza ibibazo byinshi, harimo gusenyuka kw’ibikorwa remezo bitandukanye.

Nk’uko bitangazwa n’ubuyobozi bwa Mozambique, Intara yibasiwe cyane ni Cabo Delgado, isenya inzu zisaga 110.000, igira ingaruka ku basaga 500.000, harimo n’abana cyane cyane mu gace kitwa Mecufi.

UNICEF yatangaje ko abana benshi batuye muri ako gace bari mu buzima bubabaje, nyuma y’uko inzu nyinshi zo kubamo zasenyutse, imiryango myinshi ikaba idafite aho iba.

Ikinyamakuru Le Figaro cyatangaje ko abakomerekeye muri iyo nkubi y’umuyaga bo bagera kuri 670, nk’uko bikubiye mu mibare yatangajwe ku Cyumweru tariki 22 Ukuboza 2024.