N’akumiro i Musanze: Umusore w’imyaka 22 yihinduye inkumi ajya gucucura abaturage.

Kabayiza Jean Bosco w’imyaka 22 y’amavuko, wo mu Karere ka Musanze yajyanye na bagenzi be kwiba abaturage, we agenda  yiyambitse imyambaro y’abagore ngo ayobye uburari, gusa isosi ye yaguyemo inshishi.

Kabayiza Jean Bosco w’imyaka 22 y’amavuko  yafatiwe mu Kagari ka Mpenge, Umurenge wa Muhoza, ahagana saa z’ijoro rishyira itariki ya 1 Ugushyingo 2024.

Ubwo bari binjiye mu gipangu cya Munyaneza Eugene bavugirijwe induru n’abaturage bakabatesha kwiba, ibi bisambo byahise bifatwa gusa irondo ry’umwuga ryafashe uwitwa Sabato Mugisha mu gihe abandi  bahise bakizwa n’amaguru.

Ubwo abakora irondo ry’umwuga bakoraga iperereza bashaka izindi nsoresore, baje guhura n’uwari wambaye imyambaro y’abagore muri icyo gicuku, bigira inama yo kumuvugisha, niko gusanga ari Kabayiza wari wiyoberanyije yigize ikizungerezi mugihe yari asazwe ari igitsina gabo.

Umunyamabanga Nshingwabikorwa w’Akagari ka Mpenge, Ally Niyoyita, yabwiye bagenzi bacu bo muri Kigali Today ko yahise yemera ko ari muri iryo tsinda ry’abajura.

Ati “Yahise yambara kora arenzaho kariya gakanzu, ku buryo twabanje kumunyuraho, ariko nyuma twibaza uwo mugore uri kugenda saa munani z’ijoro kandi mu cyerekezo bari bamaze kwibiramo, nibwo twamufashe atwemerera ko nawe ari mu bajura baje kwiba uwo muturage.”

Kabayiza Jean Bosco na mugenzi we bahise bagezwa kuri Polisi Sitasiyo ya Muhoza, aho bafungiye kugeza ubu.

Nsengiamana Donatien.