Neymar Jr ari mu nzira zimwerekeza mu ikipe yatangiriyemo gukina ya Santos.

Umukinnyi w'ikipe y'igihugu ya Brazil na Al Hilal yo muri Arabia Saudite, Neymar Jr ashobora gusubira mu ikipe yatangiriyemo gukina ruhago nk'uwabigize umwuga ya Santos.

Nk'uko abarimo Fabrizio Romano babitangaje iyi kipe ya Santos iri mu biganiro na Al Hilal byo kuba yatizwa uyu mukinnyi.

Neymar ku giti cye ashaka gusubira muri Santos ndetse n'ibiganiro hagati y'aya makipe yombi biri kugenda neza. Mu gihe ibi byakunda, Santos yajya yishyura amafaranga macye y'umushahara uyu mukinnyi naho andi akishyurwa na Al Hilal.

Ibi bije nyuma yuko umutoza wa Al Hilal, Jorge Jesus aheruka gutangaza ko batigeze bandikisha Neymar mu bakinnyi bazakoresha mu mikino yo kwishyura ya shampiyona dore ko urwego rwayo rwamusize.

Ati "Shampiyona ya Arabiya Saudite ni imwe muri shampiyona nziza ku isi. Abakinnyi bose ba Al-Hilal bashobora gukinira amakipe yose yo ku mugabane w'i Burayi.

Neymar ntabwo ashoboye gukomeza gukina ku rwego turiho. Ibintu byaramugoye, birababaje. Aracyafite amasezerano na Al-Hilal kandi birashoboka ko ari we ugomba guhitamo ejo hazaza.

Bizaterwa n'ubuyobozi. Ntacyo nzi ku bijyanye n'ejo hazaza ha Neymar. Dufite umwanya uboneka ku rutonde rw'abakinnyi bemerewe gukina shampiyona, wagenewe umukinnyi wavutse mu 2003 cyangwa nyuma yahoo.’’

Neymar Jr yazamukiye mu ikipe ya Santos y'iwabo muri Brazil aho yatangiriye mu ikipe yayo y'abato muri 2003 akaza kuzamurwa mu ikipe nkuru muri 2009 mbere y'uko yerekeza muri FC Barcelona muri 2013 atanzweho akayabo k'amafaranga agera kuri miliyoni 57 z'Amapawundi.