Perezida Kagame yakiriwe na Dr. Ahmed bin Hassan Al Hammadi muri Qatar.

Perezida Paul Kagame, yageze i Doha muri Qatar aho yitabiriye Isiganwa rya Formula 1 ryiswe Qatar Airways Formula 1 Grand Prix 2024.

Ibiro Ntaramakuru bya Qatar byatangaje ko Perezida Kagame yageze ku kibuga cy’indege mpuzamahanga cya Hamad ku wa Gatandatu tariki 30 Ugushyingo 2024.

Umukuru w’Igihugu cy’u Rwanda yakiriwe n’Umunyamabanga Mukuru muri Minisiteri y’Ububanyi n’Amahanga, Dr. Ahmed bin Hassan Al Hammadi, ndetse na Ambasaderi w’u Rwanda muri Qatar, Igor Marara Kainamura.

Biteganyijwe ko muri iri siganwa u Rwanda rumurikira abarikurikira gahunda yarwo ya Visit Rwanda n’aho rugeze rwitegura kwakira Inama y’Inteko Rusange y’Ishyirahamwe ry’Umukino wo gusiganwa mu modoka ku Isi, FIA mu birori bizabera i Kigali.

Isiganwa rya Formula 1 ririmo kugana ku musozo, aho hasigaye irya Qatar GP ndetse na Abu Dhabi GP, hagakurikiraho igikorwa cyo gutanga ibihembo ku bazitwara neza mu mikino yo gusiganwa mu modoka, igikorwa kizabera i Kigali.