UEFA Champions League: Real Madrid na Manchester City zandagajwe bikomeye cyane.

Mu mikino y’Umunsi wa Kane wa UEFA Champions League yabaye ku wa Kabiri, tariki ya 5 Ugushyingo 2024. Ikipe ya Real Madrid yatsinzwe na Milan AC ibitego 3-1 naho Manchester City itsindirwa kwa Sporting Lisbon ibitego 4-1.

Kuri Stade yitiriwe Santiago Bernabeu,ni ho ikipe ya Real Madrid yari yakiriye Milan AC mu mukino watangiye iyi kipe yari mu rugo ubona ifite imibare yo gushaka igitego hakiri kare cyane cyane binyuze kuri Kylian Mbappé wari ufite inyota yo gutsinda.

Byasabye iminota 12 gusa kugirango ikipe ya AC Milan ifungure amazamu ku gitego cyatsinzwe na Malick Thiaw.

Nyuma yo gutsindwa igitego, Real Madrid yakomeje ikina ishaka uko yakwishyura ndetse yabigezeho ku munota wa 23, Vinicius Junior ayishyurira kuri penaliti yavuye ku ikosa yari akorewe na Emerson Royal mu rubuga rw’amahina.

Milan AC itakinaga byinshi, yongeye guhana Real Madrid iyitsinda igitego cya kabiri ku ishoti Rafael Leao yarekuye, Umunyezamu Andre Lunin arikuramo gusa ntiyafata umupira ngo awukomeze usanga Alvaro Morata ahita awushyira mu izamu, umukino uhindura isura.

Igice cya mbere cy’umukino cyarangiye Milan AC ikiyoboye n’ibitego 2-1. Mu gice cya kabiri, Real Madrid yakoze impinduka mu kibuga havamo Aurelien Tchouameni na Federico Valverde hajyamo Eduardo Camavinga na Brahim Diaz.

Milan AC  yongeye gusubira  Real Madrid ku munota wa 73, ubwo Tijani Reinders yarekuraga ishoti riremereye ku mupira mwiza yahawe na Rafael Leao nyuma yo gucenga cyane akanabandagaza abarimo Eder Militao, iyi kipe ibona igitego cya gatatu ityo. Iminota 90 yarangiye Milan AC itsinze ibitego 3-1.

Mu yindi mikino yabaye, PSV Eindhoven yo mu Buholandi yatsinze Girona yo muri Espagne ibitego 4-0 naho Slovan Bratislava yo muri Slovakia itsindwa na Dinamo Zagreb yo muri Croatia ibitego 4-1.

Bologna yo mu Butaliyani yatsinzwe na AS Monaco yo mu Bufaransa igitego 1-0, Borussia Dortmund yo mu Budage itsinda Sturm Graz yo muri Australia igitego 1-0, Celtic yo muri Ecosse itsinda RB Leipzig yo mu Budage ibitego 3-1 naho ikipe ya Lille yo mu Bufaransa inganya na Juventus yo mu Butaliyani igitego 1-1.

Liverpool yo mu Bwongereza yatsinze Bayer Leverkusen yo mu Budage ibitego 4-0 birimo bitatu bya Luis Diaz na Cody Gakpo naho Sporting CP yo muri Portugal inyagira Manchester City yo mu Bwongereza ibitego 4-1.

Nsengimana Donatien.