Umushinga w'Abanyamerika wo kureba niba ku Kwezi haba amazi wahagaze 

Ikigo cy’Abanyamerika gishinzwe ibyo mu Isanzure, NASA, cyahagaritse umushinga cyarimo wo kohereza icyogajuru cyo gucukumbura niba ku Kwezi haba amazi.

NASA yasobanuye ko ikiguzi cyabyo n’ubutinde bwawujemo ari zo mpamvu nyamukuru zatumye kiwuhagarika.

NASA yangeyeho gukomeza uwo mushinga bishobora kuzamura ikiguzi cyawo, bikaba byatuma hari indi mishinga y’ubushakashatsi idindira cyangwa igasubikwa.

Miliyoni $450 ni zo NASA yari imaze gutakaza muri uwo mushinga.

Icyogajuru cyagombaga kuzoherezwa muri Nzeri 2025 muri ubwo butumwa, kiratangira gusenywa ngo ibikoresho bikigize bikoreshwe mu yindi mishinga.

Mu mpera za 2023 ni bwo byari biteganyijwe ko icyo cyogajuru cyoherezwa, ariko ntibyaba kubera impamvu zitandukanye zatumye bikomeza gusubikwa.