Uruganda rw'Abashinwa rukora imyenda rwafashwe n'inkongi rurashya rurakongoka 

Uruganda C&D Products Rwanda rukora imyenda ruherereye mu cyanya cyahariwe inganda cya Kigali kiri i Masoro, rwafashwe n’inkongi y’umuriro hahiramo imyenda rwakoraga.

Ni inkongi yatangiye mu rukerera rwo kuri uyu wa Mbere ahagana Saa Kumi n’imwe z’igitondo. Ibikoresho byose byari birimo byifashishwaga mu kazi ka buri munsi nk’imyenda, ipamba n’ibindi, byakongotse.

Umuyobozi Ushinzwe imikoranire n’ibindi bigo muri C&D Products Rwanda, Ntabana Yves, yavuze ko rwahiye ku buryo ibikoresho byose bakoreshaga byahiriyemo.

Ati “ Rwahiye Pe! Hahiye ibintu byose byari birimo imbere byahiye, ameza dukoreraho, imashini, ububiko bw’imyenda n’iz’ibitambaro byose byahiye.’’

Mu masaha y’igitondo nibwo kuzimya iyi nkongi byarangiye bitewe n’uko uruganda ari runini cyane.

Umuvugizi wa Polisi, ACP Boniface Rutikanga yavuze ati “ Umuriro watangiriye muri etage, ntabwo ari mu ruganda nyir’izina. Hari hakinze nta bantu bari bahari. Ibintu byangiritse ni byinshi bitarabarwa neza, nta muntu wahaguye nta n’uwakomeretse nta n’izindi nganda zo ku mpande zangiritse. Ntabwo turamenya icyabiteye.”

Uruganda C&D Products Rwanda ruri mu zikomeye zidodera imyenda mu Rwanda.