Yatawe muri yombi akurikiranyweho kugabirira umwana amazirantoki n’inkari.

Ibi byabereye mu gace ka Masaka gaherereye muri  Uganda, aho inzego za Plisi zataga muri yombi umugore  w’imyaka 34 y’amavuko, ukekwaho kwica urubozo umwana w’amezi 10, amugaburira amazirantoki n’inkari.

Uyu Stella Namawanjje, yasigiwe umwana witwa David Yolam Ssemakula n’umubyeyi we ubwo yari agiye mu rugendo rwari kumara iminsi ibiri. Ikirego kiri kuri polisi kigaragaza ko uwasize umwana yitwa Oliver Mbabazi nk’uko tubisoma mu bitangaza makuru byo muri iki gihugu.

Iki kirego kandi kigaragaza ko Stella Namawanjje yagaburiye umwana amazirantoki n’inkari, akajya afata amashusho y’ibyo bikorwa akoresheje telephone ibi bigafatwa nk’agashinyaguro yakoreraga uyu mwana muto.

Umuvugize wa Polisi muri Masaka, SP Kasirye yavuze ati “Telefone ye yaje kujya mu biganza by’inshuti ye ibonye ayo mashusho iyashyira kuri internet ahita akora ku mitima ya benshi.”

Ayamakuru yaje kugera kuri Polisi binyuze kuri  mugenzi wabo uyobora ishami rishinzwe kurinda abana n’umuryango, AIP Auma Eunice ukorera Nyendo.

Chimpreport yanditse ko inzego z’ubutabera zahise zitangira iperereza kugeza Namawanjje atawe muri yombi ndetse na telefone yakoreshejwe ifata ayo mafoto irafatwa.

Kasirye yahamije ko ikirego ubu kiri gukurikiranwa kugira ngo hagenzwe ibyaha.

Ati “Iki kibazo turacyitaho mu buryo bw’umwihariko ndetse twiteguye gutanga ubutabera kuri uyu mwana.” Ukekwaho ibyaha ubu aracyafunzwe mu gihe iperereza rigikomeje.

Nsengimana Donatien.