Amakuru agezweho: Mashami Vincent yatandukanye na Police FC.

Ikipe ya Police FC yatandukanye n’umutoza wayo  Mashami Vincent wari umaze imyaka ibiri n’igice ari umutoza wayo.

Umwe mu bagize itsinda tekinike rya Police FC, yatangaje ko Mashami  Vincent ubwe yamwemereye ko yatandukanye n’iyi kipe.

Ati "Yabinyemereye ko batandukanye".

Harakekwa ko Mashami yirukanywe kubera ko abayobozi be batishimira umusaruro w’ikipe bitewe n’ibyo yashoye ku isoko ryo kugura abakinnyi guhera mu mwaka w’imikino ushize 2023-2024.

Mashami Vincent yabaye umutoza wa Police FC mu mpeshyi ya 2022, atangirana n’umwaka w’imikino wa 2022-2023 akaba mu myaka ibiri n’igice agiye ayisigiye ibikombe bitatu birimo icy’Amahoro 2024, Igikombe cy’Intwari ndetse na Super Cup 2024.

Mashami Vincent yatoje Ikipe y’Igihugu Amavubi imyaka isaga itatu n’igice atoza, ni inshingano yahawe muri Kanama 2018 hanyuma amasezerano ya nyuma yahawe asozwa ku wa 2 Werurwe 2022, ari nabwo yahise ajya gutoza ikipe ya Police FC.

Mashami kandi yatoje amakipe arimo APR FC, Isonga FC na Bugesera FC.

Police FC yasoje imikino 15 ibanza iri ku mwanya wa kane n’amanota 23.