DRC:Ubutasi bwa gisirikare butumye Kenya Airways ihagarika ingendo yagiriraga i Kinshasa

Kompanyi y'indege ya Kenya, Kenya Airways (KQ), ivuga ko yahagaritse ingendo zerekeza mu murwa mukuru Kinshasa wa Repubulika ya Demokarasi ya Congo kubera gufungwa kunyuranyije n'amategeko kw'abakozi bayo babiri ivuga ko bafunzwe n'ubutasi bwa gisirikare bw'icyo gihugu.

Mu itangazo yasohoye ku wa mbere ku rubuga nkoranyambaga X, KQ ivuga ko idashoboye gukora izi ngendo neza nta bakozi.

Iyo kompanyi yavuze ko uko guhagarika ingendo gutangira kuri uyu wa kabiri tariki ya 30 Mata 2024.

Tariki ya 19 Mata , abakozi babiri ba KQ bafunzwe n'urwego rw'ubutasi bwa gisirikare rwa DR Congo, ruzwi nka DEMIAP (Détection Militaire des Activités Anti-Patrie), kubera ikivugwa ko ari ibura ry'ibyangombwa byo kuri gasutamo ku muzigo uhenze cyane, nkuko iyo kompanyi yabitangaje.

Ariko umuyobozi nshingwabikorwa wa Kenya Airways yavuze ko "uwo muzigo uvugwa utapakiwe cyangwa ngo wemerwe na Kenya Airways kubera ibyangombwa bituzuye".

Muri uko gutabwa muri yombi, telefone z'abo bakozi babiri zarafatiriwe ndetse bangirwa ko hari uwabageraho kugeza ku itariki ya 23 Mata, ubwo noneho abategetsi bo muri ambasade ya Kenya i Kinshasa hamwe n'itsinda rya Kenya Airways bemererwaga kubasura.

Iyi kompanyi yo gutwara abagenzi mu ndege yashishikarije igisirikare cya DR Congo kurekura abo bakozi  bagasubira mu miryango yabo.

Leta ya DR Congo nta cyo yari yatangaza kuri ibi.