Gakenke:Inzu zirindwi zarigitiye mu musozi abahatuye bahita bimurwa igitaraganya

Umusozi wo mu Karere ka Gakenke mu Murenge wa Mugunga witse, inzu zirindwi zihita zirigita  inzindi 19 abazituyemo bahita bimurwa igitaraganya.

Ubuyobozi bw'ako Karere butangazako umwe mu baturage yahise ajyanwa mu bitaro kubera guhungabanywa n'ibyo yabonye.

Amakuru avugako uyu musozi watangiye kugaragaza ibimenyetso byo kwika mu mpera z'icyumweru gishize.

Kuva icyo gihe Ubuyobozi bw'ako Karere bwatangiye kwimura bamwe mu batuye kuri uyu musozi kugirango hirindwe ko uwo musozi watwara ubuzima bw'abo.

Umuyobozi w'Akarere ka Gakenke  Mukandayisenga Vestine yaganiriye n'UMUSEKE dukesha iyi nkuru, yavuzeko bihutiye gufasha abaturage bari bahatuye bose kuko ubu bari kuba bameze nabi.

Ati" Ahantu haridutse babura buri kwimwe bari bafite. Ni imiryango 26 yahuye n'iki kibazo inzu zirindwi zahise zigenda izindi 19 abazituye duhita tubimura ariko ubu bose bameze neza.

Kugeza ubu imiryango 26 niyo yagizweho ingaruka no kwika k'uwo musozi,  kandi Akarere ka Gakenke kakaba kabashakiye aho kuba bacumbikiwe mu gihe hagitegerejwe ubundi bufasha.